వివిలా! శివసాగర్!

- కె. దివాకరాచారి

'తూర్పు పవనం వీచెనోయ్'
అంటూ 68లో వసంతకాల మేఘగర్జనతో
సాగిన నీ ఉద్యమ కవిత,
'గార్ల రైలు దారిలోన గుంజుకొన్న
బల్ రైఫిల్ నీకిస్త తమ్ముడా' అన్న
నీ పిలుపు ఎన్ని తిరుగుబాటు గొంతుకలను
ఉద్యమదారుల్లోకి నడిపించాయో!
ప్రజల్ని సాయుధం చేసిన రెవెల్యూషనరీ కవిత్వం నీదే!
'నరుడో భాస్కరుడా' అంటూ
విప్లవ కవిత్వానికి నిర్వచనం చెప్పి,
నినాదాల హోరు నుండి ఉద్యమ కవిత్వాన్ని
జన హృదయాలను కదిలించేలా
పెను నిద్దుర వదిలించేలా చేసిన సాహితీ సైనికుడా!
ఆయుధం పట్టిన కలం యోధుడు
అడవిలోనూ, అక్షరంతోనూ ధీరుడుగానే నిలుస్తాడు!
ఓరుగల్లు జైలుగోడల్ని దాటివచ్చి
రా.కొ.శాస్త్రి ఇంట్లో
మావో ఓదార్పు గీతం
'నా మల్లియ, నీ మొగిలి ఆకాశం చేరెను'
పాడిన ఆ ఆ్రర్థ గొంతు, ఆ రూపం కళ్లెదుటే కదలాడుతోంది
అవును నిజం నీవన్నట్టే
నీవొక మరణం లేని సైనికుడివే!
ముదిమిలో 'ఆయుధం' జారిపోయినా,
ఆచరణ దారిలో అడుగులు తడబడ్డా,
తలవంచక నిలిచిన నీ అక్షరాలు
ఉరి కొయ్యలపై స్వేచ్ఛాగానాలు చేస్తూనే ఉన్నాయి!
నీ పాట, నీ పలుకులు,
గంగ దాటెల్లిపోయే చెల్లి చంద్రమ్మలకు,
విల్లంబులు ఎక్కుపెట్టి నిలిచిన
తోటరాముడులాంటి విలుకాండ్లకు,
నూతనలోకం కోసం నిరీక్షించే
మా లాంటి చాతక పక్షులకు
పోటెత్తి, పొంగి పొరలే ఓల్గా, యంగ్సీ నదులే!
ఖడ్గాన్ని మీటి ప్రచండ జన సంగీతాన్ని
తన్మయత్వంతో పలవరిస్తూనే ఉన్నాం!
అందుకే 'ఫీనిక్స్' పక్షిలా
రెక్కలల్లార్చుకొంటూ మళ్లీ తిరిగొస్తావులే!
వివిలా శివసాగర్! వివిలా శివసాగర్!

- కె. దివాకరాచారి
93910 18972
http://andhrajyothy.com/vividhaNewsShow.asp?qry=2012/apr/23/vividha/23vividha5&more=2012/apr/23/vividha/vividhamain&date=4/23/2012