శివుడు సాగరుడు చిరంజీవి

సాగరుడు
తిరిగివస్తాడు.. తిరిగి లేస్తాడు
గుండెల్లో దూకుతున్న జలపాతంలా
కొండల్లో మోగుతున్న జనంపాటలా
శివుడు.. తిరిగివస్తాడు.. తిరిగి లేస్తాడు
పాలక పక్షం కంటిలో ఇసుకరేణువులా
వరదయిన తొలకరి వానలా
నెత్తురుకు ధిక్కరణ నేర్పే పిల్లనగ్రోవిలా
ఆకాశంలోని కోట్ల నక్షత్రాలకు స్ఫూర్తినిచ్చే
అద్భుత నక్షత్రంలా
నాగేటి చాళ్ల మధ్య నవ్వే రైతులా
తిరుగబడిన గాలిలా
యుద్ధాన్ని నేర్పే మట్టి వాసనలా
అట్టడుగు జనం నుండి
తిరిగి వస్తాడు.. సాగరుడు తిరిగి వస్తాడు
గోధూళి వేళ ఎరుపెక్కిన పశ్చిమంలా
అరచేతిలో తిరుగబడిన గోరంటాకులా
తన కెరటాలతో ఆకాశాన్ని ముంచిన సముద్రంలా
దీపం నక్షత్రమయి ధిక్కార సంగీతాన్ని వినిపించిన వేళ
యుద్ధనౌక ఆయుధాలతో బయలుదేరే వేళ
తిరిగి వస్తాడు.. సాగరుడు తిరిగి వస్తాడు
చట్ల కొమ్మలు పక్షులకు ఆయుధాలనందించిన వేళ
రాలిన ఆకులు పోరాటమే
జీవిత సత్యమని విప్పి చెప్పే వేళ
తల్లి చనుబాలు గీతమయి సాహిత్యాన్ని వెలిగించే వేళ
అందరూ ఆయననే తలపోస్తున్న వేళ
తిరిగి వస్తాడు.. సాగరుడు తిరిగి వస్తాడు
ఆకాశం భూమిని ధిక్కరించే వేళ
పొన్న పూలు రాలి కూడా ఎగిరిపడుతున్న వేళ
వీధి దీపాలు దోపిడీపై తుపాకులయి మ్రోగే వేళ
కన్నీరు కార్చిచ్చుగా మారిన నేలమాశిక నుండి
తిరిగి వస్తాడు.. సాగరుడు.. తిరిగి లేస్తాడు
అరణ్యాలు సత్యాన్ని ఆవిష్కరించే వేళ
గోదారి సముద్రమయి విప్లవ సముద్రమయిన చోట
మరణ శాసనం దోపిడీకి చరమగీతం రాసే వేళ
తిరిగి వస్తాడు.. తిరిగి లేస్తాడు
సర్కారు కట్టుకథలు మట్టి కరిసి ఓడిపోయే వేళ
వీరుని సంస్మరణ దినోత్సవాలు
కౌటిల్యాన్ని ధిక్కరించే వేళ వస్తాడు
తిరిగి వస్తాడు.. సాగరుడు.. తిరిగి లేస్తాడు
ఇపుడు
వాడవాడలా శివసాగర్ గీతం వినబడుతుంది
ఆయన చనిపోలేదు
ఏ కట్టె ఆయనను కాల్చదు
తిరగబడిన జనం కన్నీళ్ల నుండి
ఆయన తిరిగి లేస్తాడు
సూర్యనేత్రం ఆయనకు ఊపిరిపోస్తుంది
పిల్లన గ్రోవికి ప్రాణ వాయువు ఆయనే
సంధ్యారాగంలో వాయులీనం సాగరుడే
సముద్రం హోరులో ఆయన పాట వినిపిస్తుంది
భువన భవనపు బావుటాగా ఆయన ఎగురుతాడు
ఆయన కొరకు ఎదిరి చూస్తాను
మృత్యుంజయం ఆయన కవిత్వం.. మహాప్రస్థానం ఆయన యుద్ధం
తిరిగి వస్తాడు.. సాగరుడు.. తిరిగి లేస్తాడు
--సి.హెచ్. మధు
http://www.namasthetelangaana.com/Editpage/article.asp?category=1&subCategory=7&ContentId=98672