ఉద్యమ నెలరేడు

పాటల తాకిడికి పగిలిన నిశీధాలు
మాటల ఉరవడికి చిట్లిన ఆకాశాలు
పాద స్పర్శకు తమకించిన బీడు నేలలు
ఆలింగనాలకు పులకించిన అడవి కూనలు
చూపుల వేడిమికి తుకతుక ఉడికిన సందర్భాలు
అతడికోసం వెదుకుతున్నాయి
అతడిక లేడని వాటికి తేలీదు

అతడు-
గుత్తికొండ బిలంలో తెరుచుకున్న
మోజెస్ ఫాలనేత్రం
సినాయి కొండ మీద లిఖించిన
శివుడి పదకొండో ఆజ్ఞ
రాంనగర్లో విరబూసిన లుంబినీవనం
రష్యన్ చెలి రాగాలాపనలో తడిసి
నెత్తుటి ముద్దయినవాడు
అభినవ బోధిసత్వుని ఆరాధనలో మురిసి
వెచ్చటి పొద్దయినవాడు
బహిర్యుద్ధంలో బందూకయినవాడు
అంతర్యుద్ధంలో బందీ అయినవాడు

అతణ్ని చూసినప్పుడల్లా అనిపిస్తుంది-
ధ్యేయం ఎంత గొప్పది!
అతడి ధ్యేయం నిర్దేశించిన ప్రస్థానమెంత గొప్పది!!
గేయం ఎంత గొప్పది!
అతడి గేయం తోడిపోసిన జీవజలమెంత గొప్పది!!
అతణ్ణి తాగినప్పుడల్లా అనిపిస్తుంది-
కల ఎంత గొప్పది!
అతడు కలగన్న సౌందర్యరాజ్యమెంత గొప్పది!!
కలం ఎంత గొప్పది!
అతడి కలం రేపిన సామాజిక సంచలనమెంత గొప్పది!!

అతణ్ని ముద్దాడినప్పుడల్లా అనిపిస్తుంది-
వర్గం ఎంత గొప్పది!
అతడి వ్యతిరేక వర్గం జరిపిన వ్యూహాత్మక
విద్రోహమెంత గొప్పది!!
కులం ఎంత గొప్పది!
అతడిది కాని కులం జరిపిన బహిరంతర
విధ్వంసమెంత గొప్పది!!

అడవిని మనువాడే చందమామ
అమావాస్య నాటికి ఎన్‌కౌంటరవ్వాలి
ఇది సవరణలకు తావు లేని రాజ్య నియమం
అడవికి విడాకులివ్వగల చందమామ
చీకటిని రద్దు పరిచే సూరీడవ్వాలి
ఇది సవర్ణులకు మింగుడు పడని అతడి నియమం

ఇంతా చేస్తే-
అతడొక విషాదాంత విప్లవ కావ్యం
విషాదం ఏంటంటే
అతడు అడవిని జయించలేకపోయాడు
ఏలయనగా-
అప్పటికే మనుధర్మం అడవిని కబ్జా చేసి వుండెను

నేను నిర్మించింది నాది కాకుండాపోయింది
చేసిందేమీ మిగల్లేదు... రాసిందే మిగిలింది''
అన్నాడతడు
కలే కంట్లో ముల్లై దిగినప్పటి బాధ!
పార్థివ దేహాలు ప్రపంచభాషలో మాట్లాడతాయి
ఆర్థిక దేహాలు అర్థం చేసుకొనును గాక
అతడిప్పుడు-
తీర్పరితనాన్ని వెక్కిరించే పీఠమ్మీద
తిష్టవేసిన హతసాక్షి!
ఎక్కుపెట్టిన వింటిమీద
విశ్రాంతి తీసుకుంటున్న నిర్నిమేష నేత్రం!!

- పైడి తెరేష్‌బాబు
99484 91523
(కె.జి.సత్యమూర్తి మిగిల్చిన అసంతృప్తికి
నిరసనగా శివసాగర్‌కి ప్రేమతో-)
- పైడి తెరేష్‌బాబు
http://andhrajyothy.com/vividhaNewsShow.asp?qry=2012/apr/23/vividha/23vividha1&more=2012/apr/23/vividha/vividhamain&date=4/23/2012