స్మరణకు విస్మరణకు నడుమ

నివురు గప్పిన చరిత్ర నిప్పులాంటి వార్తవుతున్నది
కలలునిండిన పార్ధివదేహం రేపటి వర్తమానానికి పురుడుపోస్తున్నది
టైమ్‌మిషీన్ సాంస్కృతిక పునరుజ్జీవనమ్ కోసం వెనుకకు తిరుగుతున్నది
మనువాదపు విలువలు విస్మరించిన విప్లవ గాయాలు
సలుపుల గేయాల దరువును విన్పిస్తున్నవి
మౌనపు ఆక్రందనల్లో మార్మోగిన పాట నిశబ్దపు కరతాల ధ్వనుల మధ్య
మూలవాసి అస్తిత్వపు విలువలు సృష్టించబోయే సునామీకై ఎదురుచూస్తున్నది
తలెత్తుకు బతికేందుకు తలనరుక్కున్న దేహాలు బహిరంగంగానే గొంతు పెకిలిస్తున్నవి
మూతికి ముంత ముడ్డికి ముండ్లకంపతో బంధించబడిన ప్రశ్నలు
అర్ధసత్యాల ముసుగు తొలగించేందుకు సమాధానపు కొడవండ్లకు సానబడుతున్నవి
కంచెమేసిన చేనులో పరిగలేరుకునే అవకాశవాదులను తరిమేందుకు కాసుకున్నది వడిసెల కబేలాలు బలిపశువులకు మద్దతుగా సభలు నిర్వహిస్తుంటే
వెలివేయబడిన గొంతులు తమను తామే ఆహ్వానించుకుంటున్నయి
పగిలిన నిప్పటికెను అతికించుకునేందుకు కుమ్మరిపురుగు సారెకై ఎతుకుతున్నది
త్రిశంకునికి విశ్వామివూతుడు సృష్టించిన స్వర్గంలోని గతితర్కం బోధపడుతున్నది
బరువుమోయలేని బానిసలు తమ కిరీటాలను వామనుడికి తాకట్టు పెడుతుంటే
తలకిందులుగా వేలాడుతున్న గబ్బిలానికి ఇప్పుడిప్పుడే మూడడుగుల నేల
మర్మం అర్థమవుతున్నది
వేటాడే సింహాలు అధికారం కోసం పచ్చిగడ్డి తింటుంటే
పెద్దకూర కోసం మేకలు ఆత్మగౌరవ యద్ధాలు చేస్తున్నవి
జ్ఞానం సత్యం కోసం స్వార్థపు శిరస్సు నరికేసుకున్న
సిద్ధార్థుడు నేడు శివసాగరుడై అర్ధాంతరంగా నిష్క్రమించాడు
స్మరణ విస్మరణ నడుమ బోధివృక్షం మరో బుద్ధుడి కోసం పరితపిస్తున్నది
--హజారి
(భారతీయ సాంస్కృతిక విప్లవపథాన్ని సంఘటితం చేయలేకపోతున్న ఎందరో
శివసాగరుల నిస్సహాయతకు నివాళిగా...)
http://www.namasthetelangaana.com/Editpage/article.asp?category=1&subCategory=7&ContentId=98667